CAMMINA C ARRIVARRAIE Antonio Taiuti Ddoie semmane fa io, 'o cinese e Umberto Bacchetta stevemo ienno 'o bagno all'Isolotto 'e San Martino e, mentre stevemo tutt'e tre dint' 'a machina 'e Umberto, a 'nu cieto punto, verso Baia, fernesce 'a benzina e 'a machina se ferma. Allora io, senza me perdere 'e curaggio, pigliaie nu buttiglione e ghiette a cerca' 'na pompa 'e benzina. Doppo tre-quattruciento metre domandaie a 'nu viecchie ca steva assettato fore a 'na porta: "Scusate, me sapisseve dicere addo' sta 'na pompa 'e benzina 'a chesti pparte?" Isso, comme se già avesse saputo tutte cose, dicette: "Guaglio', piglia 'sta strada, quanno vide 'nu casaruoppolo gira a sinistra... doppo ciento metre, vicino a 'o cuzzecaro, truove 'o benzinaro. Ma statte attiento però, ca 'a strada è chiena chiena 'e sierpe. E ricuordate ca ll'ommo è 'o padrone d' 'a casa e si t'avesse 'a venì voglia 'e caca', guarda bbuono addo' t'anniette. Nun arnmiscà 'a 'nzalata pe' ll'evera addirosa ... Va', va' e addirmanna chi è 'On Peppe 'o gravunaro. Io venco varricchina pe' luva' 'a calimma lloro, nun te preoccupa', ca 'a n'ati quatt'oti juorni, s'araparranno 'e vocche 'e tutt'e saittelle ... e allora i cosiddetti signure de' quarti 'e Mirabella anche loro saranno raggiunti... Io appartengo a quelli dell'opera 'e pupe, 'e ssaje? ... 'A famiglia Bonandi 'e Torre 'o Grieco ... Quanno se diceva Peppe 'o materazzaro, mmiezo all'opera d'e pupe se luvavano 'o cappiello ... E mo', 'o vi', me so' ridotto a vennere muniglia 'e cernetura, varrecchina e acquaforte, detersivo e mullette p'e panni. Eh! fa' bene e scorda e si faie male piensa ... 'A saje 'a canzona, guaglio'? Tu ne si' n'auto d'a pasta fina... è ove'? Vuo' fatica'? Vuo' fatica'? Te faccio i' a vennere c'o triciclo cu' l'altoparlante a coppa: " 'Nu sacco 'e patane mille lire, signo'. 'E cepolle, signo', 'e cepolle. Huè l'aglio". E mentre faceva 'sta voce, mentre faceva 'sta voce, sa' comme fanno 'sti viecchie?, l'è venuta 'na caspita 'e tosse ca s'è accumminciato a fa' russo, russo russo ... 'O vi' lloco, aggio ditt'io, mo' more 'o viecchio. "'On Pe' ", facevo io, "ma che d'è, ve sentite male? ..." E isso nun rispunneva, pareva ca nun riciatava cchiù... Po' tutto 'nziema, bello e buono, ha ditto: "Ma tu chi si'? che vaie truvanno 'a me?" "Eh... niente", aggio fatto io, "v'avevo domandato solo addo' steva 'na pompa 'e benzina accà vicino." "'A pompa 'e benzina? ... Va', va', mariuncie', tu si' venuto a 'rrubba' ccà, è ove'?..." E piglianno 'na mazza ca teneva vicino ha ditto: "T'aggio ditto già comme 'e 'a fa': doppo 'o casaruoppolo, a mana smerza, vicino 'o cuzzecaro 'nce sta 'a pompa 'e benzina. Va', e nun te fa' vede' cchiù accà 'ttuorno, ca si no 'a vide chesta mazza? Ta scasso 'ncapa..." Io mo' che putevo fa'? Me putevo maie mettere a 'appicceca' cu' 'nu viecchio pazze? Cu' 'na santa pacienza, m'aggi' avut'a da' 'nu pizzeco 'ncopp'a panza e me n'aggia' avut'a i'. Cammenavo ... cammenavo ... cammenavo pe' dinto a 'sta strada senza vasule 'nterra e chiena chiena 'e povere ... ma 'o casaruoppolo c'aveva ditto 'o viecchio nun accumpareva maie ... Allora avutaie 'e spalle pe' me ne turna' arreto ... Macché? Comme si 'a strada nun fosse stata cchiù chella! 'O sole me cuceva 'ncapa: me luvaie 'a maglietta e m'a mettette comme cappiello pe' nun piglia' 'n'insolazione ... e mmentre stevo accussì ... mentre cammenavo ... 'a luntano vedette ... comme 'na specie 'e cunviento. Subbeto currette vicino 'o purtone e bussaie BibliotecaGino Bianco ddoie, tre vote forte forte. Doppo 'nu poco venette a arapi' 'nu criature ... 'a verità propria non se capeva si era 'nu criaturo o 'na criatura... si era 'nu nano o 'na nana ... pe' vvia ca teneva 'o caruso, proprio comme 'o fanno a chille guaglione ca stanno dinto 'o serraglio ... Io me mettette 'na caspita 'e paura e nun ero cchiù capace 'e parla'. Chisto, cu' 'na voce 'e 'na vecchia... doppo ca m'era guardato da capa 'o pede, me fa cu' 'a mano comme 'a dicere "avvicinati". E dice: "Trase ... trase... io lo saccio ca aje 'na granda pressa 'e truva' 'e cumpagnielle tuoie, ma nuie... nuie te stamm'aspettanno 'a quanno 'o sole accumminciaie a fa' luce 'ncoppa 'a sto munno". Allora so' trasuto, e dinto ce steva 'na folla 'e cristiane tale e quale a isso... 'A cosa strana è ca nun solo teneveno 'a capa 'a mellone, ma steveno tutte quante scaveze, cu 'e piede annude. Uno 'e lloro m'ha pigliato p'a mano e m'ha fatto assetta' dinto 'a 'stu piezzo 'e ciardino. "Eh, Anto', ha ditto chillo ca m'era venuto a arap1', tu nun saje... tu nun t'immagini nemmeno quanta strada avimmo fatto pe' veni' fino a ccà 'ncoppa..." Io vedenno ca sapeveno pure 'o nomme mio songo rimasto comme a 'nu fesso... e sempe cchiù muorto 'e paura gli ho chiesto: "Ma addo' me trovo...?" "Questo non ha importanza, ha detto un altro, qua ti troverai bene, potrai avere tutto quello che vuoi... tutto quello che desideri, lo avrai, perché noi ti aiuteremo ad averlo. Ma tu però dovrai aiutare noi. Scegli tu stesso chello ca vvuo'!" E ognuno 'e lloro, comme 'a chilli marrucchine ca se vedono 'mmiez'a via, hanno accumminciato a caccia' ogni specie 'e robbe: cuperte damascate 'mbuttite, lenzole arricamate, cammise 'e seta, cappotte 'e pellicce, anielle 'e brillante, rilorge d'oro, pullaste, cuniglie, faggiane, frutta 'e tutt'e specie... "Assagge, assagge chistu vino, è vino fatto con le nostre mani e messo ad invecchiare nelle botti di legno di mogano... queste mozzarelle sono fatte con il latte che esce dalle mammelle delle femmine incinte... questa è carne di agnello cresciuto nei nostri pascoli... chiste pisce songo piscate nei nostri vivai..." lo, co' 'e palle 'e ll'uocchie 'a fora e sperduto mmiezo 'a 'stu bbene 'e ddio, penzavo: "Ma chiste che vularanno 'a me?" "Pecché nun rispunne, ha ditto chill'auto, ah staie muscio e appaurato perché devi lasciare il tuo giaciglio? Nun te preoccupa' ... nuie tenimmo case ca 'a staggiona so' fresche comme 'a 'stu ciardino e case ca a 'o vvierno so' cavere comm'a 'nu ventre 'e 'na vacca... Tutto chistu bbene sarrà d'o ttuoio... ma primma però dovrai faticartelo, perché, Antonio mio, nun se po ave' 'nu chilo 'e pesce da lu pisciavinnolo senza pava' 'a capa e pure li spine. E quindi tu ci salverai, perché ogne pare 'e scarpetelle ca 'nce purtarraie, 'nu malanno 'a cuollo 'nce levarraie... Ogne pare 'e scarpetelle ca 'nce purtarraie, 'nu malanno 'a cuollo 'nce levarraie". E chillo ca m'era venuto a arapì, m'ha accumpagnate fore n'ata vota, e doppo spiegateme 'a strada p'o ritorno, m'ha ditto: "Va', va' Anto', nuie t'aspettammo. E ricuordate: scarpetelle, comme songo songo, vecchie, nove, non ha importanza, basta ca nun so' sfunnate 'a sotto, basta ca so' bbone pe' cammena'. Va', va'... Cammina ca arrivarraie". E salutanneme c' 'a mano m'ha chiuso 'o purtone 'n faccia.
RkJQdWJsaXNoZXIy MTExMDY2NQ==